[純個人廢up][製作中]JUPAS聯招研究室

小雪冰

(歡迎會員及非會員轉載本帖
惟請註明出處 謝謝合作)

免責聲明：
本帖內容為本人個人主觀意見
謹供參考之用
如因沿用本帖意見後使閣下JUPAS offer與原本期望出現落差
本人不會為此負上任何責任
敬請留意

大家好~
我係第2屆DSE考生
因為食飽飯冇野做 得閒得濟
所以就試下綜合個人諗法同埋老師輔導 再加埋自己聽過既JUPAS talk之類既資料
寫左呢個廢up帖
希望可以幫到各位DSE考生排JUPAS

如果各位想幫手補充本帖資料
歡迎以pm / 於本帖回覆通知本人

~暫定目錄~
原色 = 未開始製作
紅色 = 現時製作中
橙色 = 大致完成 或會進一步完善內容
綠色 = 已完成

#2 JUPAS簡介
#3 JUPAS選科方法
#4 JUPAS排位
#5 實用網站
#6 各大學資料
#7 出路抉擇

~聯絡方法~
如果大家想搵人幫手排一排JUPAS
只要唔嫌棄 我呢個1d都唔專業既人士都樂意比d愚見大家既
不過麻煩大家一定要比以下呢d資料我:
- 預計 / 實際DSE成績
(順序為中英數通 + 選修科
選修科要講埋係咩科
如果唔係幫唔到你計weighting)
- 至少band A 3個choices排位 最好比埋band B我
- 你有興趣讀既科目 / programme (如有 冇既就咁比科目都得)

我既聯絡方法如下:
1. 直接係度回帖
2. 樂古pm (短訊息)
3. fb (https://www.facebook.com/profile.php?id=100002380583955)
add fb既 麻煩講明你想我比d排JUPAS既意見你
唔係既話我可能會無視左你都唔定
PS 個人對商科(尤其會計)既認識比較多
至於其他科 我就真係唔太熟悉行情

~簡寫對照表~

英文簡寫	英文全寫	中文全寫
1. HKU	The University of Hong Kong	香港大學
2. CU	The Chinese University of Hong Kong	香港中文大學
3. Poly	The Hong Kong Polytechnic University	香港理工大學
4. City	City University of Hong Kong	香港城市大學
5. BU	Hong Kong Baptist University	香港浸會大學
6. IEd	The Hong Kong Institute of Education	香港教育學院
7. LingU	Lingnan University	嶺南大學
8. OU	The Open University of Hong Kong	香港公開大學
9. HD	Higher Diploma	高級文憑
10. asso	Associate degree	副學士

~更新進度~

日期	內容
18/7/2013	正式開帖 - 大致完成#3 JUPAS選科方法、#4 JUPAS排位
19/7/2013	#3 JUPAS選科加入「將來出路」原則、更新「其他出路」原則、#5 實用網站 大致完成
20/7/2013	#2 JUPAS簡介 大致完成
21/7/2013	#7 出路抉擇 大致完成

小雪冰

JUPAS簡介
最後更新：
20/7/2013 大致完成

~甚麼是JUPAS?~
JUPAS既英文全寫係「Joint University Programmes Admissions System」
中文姐係「大學聯合招生辦法」
簡稱聯招
專係幫DSE既考生申請報讀香港各間大學課程既系統
基本上每個香港學生都會經呢個系統申請入大學
而香港總共有9間大學參與呢個系統

~JUPAS所處理之課程~
JUPAS處理既課程絕大多數都係政府資助
同埋係學士學位黎既
學費比起自資既課程平好多
另外 全部課程都係full-time programme黎
如果想報part-time programme / OU以外既果8間大學既自資課程
就要直接向有關大學申請
JUPAS係唔會處理呢類申請既
正常黎講 DSE學生都唔會報part-time programme
呢d programme多數係比在職人士報
總之我地宜家仲係全職學生既時候
就可以無視呢樣野先

除左學士學位 (bachelor degree)之外
仲可以經JUPAS報HD / ASSO
教院同理大都有HD
ASSO就淨係得city有 仲要得1個咁大把-.-

所以其實JUPAS會處理既HD / ASSO申請真係幾有限
如果JUPAS既HD / ASSO唔岩口味既
咁閣下就可能要另外自己去搵其他專上院校黎報其他HD / ASSO
詳情請到#7 出路抉擇 查看

~參與院校~
而參與呢個系統既9間大學如下:
1. HKU 香港大學
2. CU 中文大學
3. UST 科技大學
4. CityU 城市大學
5. PolyU 理工大學
6. BU 浸會大學
7. IEd 教育學院
8. LingU 嶺南大學
9. OU 公開大學

頭8間大學既課程都係政府資助
惟獨是OU係自資
正常黎講 多數學生都係報頭8間大學
咁當然唔係話唔放得OU啦
只係學費就真係貴d咁lor

~總結~
DSE學生一定會報JUPAS黎入大學
E-APP (另一個處理專上院校申請既系統 #7都會有簡介) 就隨大家喜歡 報左既可以當係第2手既準備
但係唔報都冇所謂
有關個人對於放榜後既出路意見
請移玉步至#7 出路抉擇

小雪冰

JUPAS選科
最後更新：
19/7/2013 加入「將來出路」原則、更新「其他出路」原則

講到JUPAS選科呢樣野
唔知大家有咩原則啦
綜合番我自己既諗法同埋其他資料 (例如老師輔導+JUPAS talk)
就得出以下個人認為比較重要既原則
(重要性由高至低排列):
1. 興趣
2. 個人能力
3. 將來出路
4. 大學(某個學系)名聲
5. 學系課程結構
6. 大學特色
(註:個人認為大學名聲&課程結構&大學特色同樣重要)

1. 興趣
個道理好易明
尤其係對於讀緊自己冇興趣既科目既高中生黎講
3年時間都要對住自己唔鍾意既科
果種感覺真係幾甘下
宜家仲要係講緊JUPAS選科呢樣會影響你一生既事
JUPAS選科果度一旦入左自己冇興趣既系
諗起黎緊自己至少有4年要對住呢個系
真係喊都無謂
(轉系除外
但係講真 既然始終都係要轉
先唔理個人能力之類既條件
點解唔一開始就揀科自己有興趣既系黎讀呢)
同埋你讀得呢個系 將來出黎搵工既時侯都係偏向搵番同呢個系有關既工作
如果一個唔好彩 你真係要成世對住呢類工作
咁當初你係JUPAS揀既科 就係咁影響你一世架啦
(又係果句 當然你絕對有權去搵份完全同你讀果個系冇關既工作
但係早知係咁 不如係JUPAS選科既時候揀番自己有興趣既科咪仲好)

而且 對住自己有興趣既系
當然係有好處
一來唔使講 自己讀起上黎都開心d先
我都有呢類經驗
本身我高中揀左BAFS (企會財)黎讀
因為我自己對呢科有興趣
(我鍾意計下數咁 好憎背書)
所以就算溫呢科既時候要花好多時間都好
但係我都冇咁易覺得悶
果種感覺有d似「快樂不知時日過」
咁當然又冇咁誇既

二來 成績方面 有興趣讀既
成績真係會好過你讀科自己冇興趣讀既科
因為溫書 / 做功課既時候冇咁易悶
只要你係勤力既人
你放落去既心機 少極有個譜
於是你溫書既質素就可以保持一定既水平
成績自然都有番咁上下啦

講完興趣呢個原則既重要性之後
係時候講下應該要點樣發掘自己既興趣
事關一定有批人係唔知自己既興趣係咩
由於我自己唔係呢方面既專家
我最多都係提供1d方法比大家參考一下
而有關既方法如下:
a. 去大學open day
b. 留意下自己對宜家讀緊既選修科既興趣
c. 個人經歷

a. 去大學open day
呢個方法可以幫你更加了解果個系
知下呢個系究竟係讀咩、將來又可以打咩工咁樣
再諗下自己有冇興趣讀呢個系
其實如果你一開始連呢d野都唔清楚
咁幾危險下
可能會入左呢個系之後先知原來自己唔係想讀呢個系
咁就大件事
而且open day仲有其他用途
例如係知多d收生數據、問下問題 (唔理係professor定student helper都好啦)、摸熟去唔同大學既路(? 其實唔係最大既用途黎haha)
所以強烈推薦大家去最遲由中4開始去大學open day

b. 留意自己對讀緊既選修科既興趣
呢個方法可以話係最實際
畢竟你宜家已經接觸緊呢科
自己對呢科既興趣 好易就知道
就算咁不幸 你對呢d選修科都冇興趣
咁起碼你都知自己對咩科冇興趣先啦
同埋知道自己偏向鍾意背書定係理解一大堆概念
呢樣野都有助大家揀科既

c. 個人經歷
咁做人唔係淨係番學讀書咁寡既
我諗大家點都會有d課外活動玩下
例如係做運動 (踢波打波乜都好)、做義工、玩下手工藝、跳舞咁
冇都唔緊要 咁咪咩都試下玩
咁樣都會幫到你發掘自己既興趣

總括而言
個人認為興趣絕對係JUPAS選科入面最重要既原則黎
冇其他原則可以凌駕於興趣之上架啦

2. 個人能力
好啦 知道自己興趣係咩之後
就要番番黎現實
首先你當然要知道 究竟你想讀既科既收生成績係點啦
跟住再喇番你自己既成績黎對比一下
(收錄收生成績既網址可到此帖#5實用網址查看)
如果咁不幸 果科係收得好高既
但你成績只係中中挺挺 甚或係下游
假如時間尚早 你就好拿拿林谷下成績啦
如果真係差太遠 咁都建議大家再睇下會唔會有其他要求冇咁高既課程
費事谷得自己咁辛苦之餘 又未必入到去 雙重打擊咁慘

如果咁岩兩者係符合既
甚至你既成績係高過收生成績 (其實應該比較少見-.-)
咁當然就完美啦
但係一樣要谷成績 / 保持狀態
確保自己可以穩穩陣陣咁入去

呢度指既能力除左係成績之外
都可以係指個人長短處
你有興趣讀既系 將來可以做既相關工種究竟適唔適合你呢?
例如你想做既果份工要求你有好高既溝通能力
但係你自問溝通能力真係一般架姐
咁你或者會幾難係呢個行業度成功
又例如你好有創意既
咁做科研 / 藝術就可以發揮到你既長處
不過要重申一點
就係唔好單單因為果個系發揮到你既長處
就唔理自己對佢有冇興趣 係咪都入左去先
個人認為一定要興趣行先

3. 將來出路
我想講既唔係話將來份工幫唔幫到你搵好多錢
呢樣唔係重點
而係你要知道你讀完你想讀果個系之後
出到黎有d咩工可以做
有d系(例如社會科學)讀完出黎冇話有咩專門既工可以做既
而係好多工都可以做
如果你想讀既課程係呢一類
都要留意下以往既畢業生出到黎會做d咩
再知多少少呢份工既資料
例如呢份工既工作性質、工時、待遇咁
作為一個參考
有d就有 例如專科 姐係牙醫 / 視光學呢類
咁多數讀完出黎都係做番同一樣野架啦
不過一樣要搵埋呢份工既資料
睇清楚份工同你可唔可以互相配合

當然 有時候出路呢家野
唔係自己決定
將來可能個就業市場會變左好多都唔定
但係咁唔代表你唔使知道將來自己可行既出路係咩
正常黎講都應該要準備定先
唔通到時先黎由頭開始準備咩 咁真係會遲得濟

4. 大學(某個學系)名聲
如果上面果3個原則你都冇問題既
咁就恭喜你先
宜家就要睇埋你想讀果個系係邊間大學有搞
同埋邊間搞得最出名
跟住就朝住呢個目標進發

舉個例 香港有好多間大學都有開商科
最頂尖既 就係科大(UST)
港大同中大都有搞 但係都唔及科大咁勁

又例如中醫
香港就得浸大(BU)、中大(CU)、港大(HKU)呢3間大學有開到
當中以浸大既中醫最出名
佢仲有自己既中醫學院tim
雖然中大同港大係香港都係一流既大學 (同科大合稱3大)
浸大就稍為遜色
但係講到中醫呢個系 就係浸大搞既最出名
所以真係想讀中醫 自己又有能力既
首選就係浸大中醫

5. 課程結構
雖然話係同一個學系
但係唔同大學所搞既學系 形式未必完全一樣
要小心留意呢d學系既課程結構
以商科為例
中大iBBA係冇得以a/c作為major
想係中大讀a/c 就一定要讀professional accountancy先得
不過poly既business broad discipline就有得揀番a/c做major
當然 亦都可以直接入poly accountancy黎修a/c

睇完課程結構
另外都唔差在睇埋internship既安排
呢樣就唔使知得好詳細
大概知下呢間大學既呢個學系既實習機會有幾多就得

6. 大學特色
每間大學既特色都不盡相同
例如我聽聞中大既校風就比較好
科大就好chur (姐係好著重學術成績 係果度讀書會幾辛苦下)
理大(poly)就幾多NDS (內地生)
教院(IEd)就講到明面試唔得就必定唔收既
JUPAS揀科既時候 最好都留意埋呢d資料
畢竟環境因素都會影響到你呢4年既大學生活

7. 其他原則 (例如交通)
因為個人認為冇以上原則咁重要
我就唔多講
咁當然 大家都可以考慮埋既
但考慮呢d原則之前 建議先考慮上述原則

不過再補充多少少
我相信一定有人揀科既時候係向錢看
咩科賺錢賺得多 就想讀果科
我個人就唔多支持呢種諗法
你話咁岩你對呢科有興趣、又有能力之類 咁都冇問題

但係如果唔係呢種情況
你又淨係用錢黎做原則既話
咁真係唔多惦
違反左興趣、個人能力同將來出路呢3個原則之後會出現既問題
上面已經有講

另外就係 就業市場可以分分鐘好波動
今日你睇落呢份工搵錢搵得幾爽皮
但係你又擔唔擔保你畢左業出到黎
姐係4-6年後
仲有呢支歌仔唱呢?
所以奉勸大家一句 凡事三思而後行

小雪冰

JUPAS排位
最後更新：
18/7/2013 大致完成

揀完科就梗係要排位啦
排位呢度會講2個主題:
1. 基本排位原則
2. 唔同階段既排位技巧

1. 基本排位原則
原則如下:
a. 收生quota
b. 指定科目比重(weighting)
c. 以往收生成績 / 分數

a. 收生quota
有d學系個quota真係少得可憐 得果10個
有部份就唔過100
3位數既都有
quota決定到2樣野 就係一個位既競爭人數同埋放呢個choice既穩陣程度
前者就咁睇1個學系就可以得出
而後者就要綜合你JUPAS既排位先可以得出
1個學系既學位競爭人數會由幾個至百幾個不等
個人認為20個或以下都算正常
而今年其中一個競爭最激烈既學系就係理大酒管
幾乎係100個人爭一個學位 真係幾得人驚下
如果你揀既學系幾多人爭既話
咁可以肯定既係 你既成績一定要好高先夠人爭

至於放choice既穩陣程度
通常會睇番band A入面果3個課程既quota
個人認為至少要有1個係收超過100個
尤其係A3
A1收得少d既都由佢 話明係搏 咁就冇所謂
除非你唔想搏架姐
另外 可以夾埋學位競爭程度黎衡量穩陣既程度
確保自己冇作出任何自殺行為

b. 指定科目比重 (weighting)
呢樣野就緊要喇
大家要謹記一點
就係DSE分數唔等於入學分數
DSE個分係冇經過任何weighting既調整
但入學分數就未必
入學分數係指你係呢間大學某個學系既分數
用黎決定你係大學收生既list上面既位置
你入唔入到呢個學系 就係睇呢個分所幫你決定既位置架啦

大學多數會講明咩學系對於咩科既比重會比較大
例如科大BBA就講明英文同數學會x2 其他科就x1
理大chem tech就話中英數、chem、combined science with chem有highest weighting
(姐係x10
主科冇講明weighting既話姐係x7
一般electives冇講就會x5)
知道weighting之後 就要對自己既成績做個對照
諗下自己係呢d有weighting既科(如果有讀)會唔會佔優
又或者係處於劣勢
再衡量自己入到呢個學系既機會

c. 以往收生成績 / 分數
即使係官方既資料 定係非官方、專用黎查以往收生成績既網站(=ATUHK 詳情請到#5實用網址查看)既資料都好
呢樣野暫時黎講真係只可以做參考
事關宜家DSE新制都淨係收得果1年學生
所以得1年數據可以參考
價值實在唔高
加上舊年出現洗牌效應
(姐係成堆人驚死 揀哂收得低既科
收得高既科反而少左人揀
結果就一堆人攬住一齊死
本身收得低既科就變左收得高
係個古怪既現象黎)
就更加唔準
所以 要睇唔係問題
但係唔好當正正式數據
最好預番比起宜家既成績 / 分數高d既成績
咁就穩陣d

仲有要留意既係
如果係睇大學官方數據
小心每間大學出既數據都唔同
例如中大係出DSE每科既grade
有齊lower quartile & median & upper quartile
(但係唔可以就咁睇個grade 因為入面已經暗地裡包埋面試之類既其他分數)
科大都係咁出 只係少左upper quartile
理大就係出入學分數既平均
簡單黎講 每間大學既數據睇法都唔一樣
唔可以用哂同一種方法黎睇呢d數據
唔係既話 睇完=冇睇 仲可能fake左自己

2. 唔同階段既排位技巧
JUPAS排位係有分呢幾個階段既(按時間順序排列):
1. 放榜前 (DSE考試既前一年12月左右截止 可以免費改一次)
2. 放榜前 (過左免費改排位之後 DSE考試果年既5月尾截止 呢個階段要比$80改一次 次數無限)
3. 放榜後幾日 (唔同人有唔同既改排位時間 但每個人都係得24小時架姐 可以免費改一次)

無論係咩階段都好
總之最緊要既位置都必定係band A & B
C或以下其實都可以唔使點理架啦..
因為講真 大學好少會收排左佢個學系band C或以下排位既人
除非係HD / ASSO / 所謂既頹科啦

另外 除左第1階段之外 (DSE考試前一年12月截止果個階段)
其他階段既排位原則可以參考呢個表:
A1 : 你既成績要入呢個系就有d”蚊水” 但係都可以試下搏 同埋係你最有興趣既
A2 : 你既成績就穩陣d啦 起碼接近median先 ; 而且興趣都大既
A3 : 你既成績好穩陣 亦都有興趣既
總之就盡量將d排位放到確保自己入到band A既choice
Band B其實都真係”蚊水”…
C或以下就更加唔使講

講番每個階段既排法先
1. 放榜前 (DSE考試既前一年12月左右截止)
呢次係大家第一次排位
排既時候 必定要留意自己想讀既系既面試安排
(面試安排可以上網JUPAS官網 / 各大學官網睇番
有關網址及查看方法 請移玉步至#5實用網址)
至少你要知使唔使面試、係放榜前定後面試、佢點樣先會叫你去面試
(例如佢淨係會in放左佢個學系係band A既人)
形式暫時可以唔使理住 當然知道就最好 但係都唔急既

呢個階段 最好放番有面試既科係比較頭既位置 (多數係band A)
因為要爭取面試機會 愈多愈好
大多數大學既面試都係加分制
姐係你面得好就有分加 面得唔好都唔會扣分 只係冇分加咁解
除左教院(IEd) 教院就講到明面試唔得就必定唔收既
當然大前提係 你放既科係你有興趣既先啦

如果係可能要去面試既話 咁就視情況而定放唔放佢係band A
姐係假如其他你有興趣既系係肯定要in 同埋係放榜前既
就放左呢d上去先
因為實際情況我又好難列哂出黎
有需要既 大家可以再另外搵老師 / 朋友 / 家人 / 我等等黎幫幫手
我既聯絡方法放左係#1

2. 放榜前 (過左免費改排位之後 DSE考試果年既5月尾截止)
呢個階段就未必需要理會
視乎個人情況而定
DSE未考哂之前 其實正常黎講都唔會突然間好需要改-.-
所以可以肯定既係 通常想係呢個階段改既
都係考哂DSE之後果段時間
因為你大概預測到自己既DSE成績
假如真係同你本身實力差太遠
咁可能真係要執番d收生收得比你本身實力低既系上高d既位置
執既時候 記得留意埋面試安排

當然 唔一定要係上述呢個情況你先改得
總之你覺得改完會穩陣d既 咁比一次錢黎改 其實都抵既
點都好過你之後後悔自己當初冇改到啦

3. 放榜後幾日 (唔同人有唔同既改排位時間 可以免費改一次)
呢個階段就關鍵喇
成敗全在於今次排位
知成績之後 排起上黎都叫做有番d依據

而呢個階段既排法都係同上面個表差唔多
不過記得要睇埋quota & weighting &以往收生成績
如果你要求200%穩陣
A1-3都可以放穩陣既科係度
只係A1要搏既話 就睇埋A2-3呢2個科以往收既學生係排左佢地係band A入面邊個位
姐係banding問題
因為唔係個個科都會收A2或以下既人
A2-3就唔好再搏啦 唔係既話真係驚會冇offer
最多搏A1就夠皮
除非你真係唔志在 正常黎講就唔會咁做

小雪冰

實用網站
最後更新：
19/7/2013 大致完成

PS 按下網站名稱即可連結到其網址

官方網站:
1. JUPAS大學聯招
官網都真係幾有用
一來 改choice就一定係經呢度改啦
二來 重要日期、各間大學既課程、課程資料調動、各大學搞既活動係呢度都會有個一覽表
一定要不時上去睇 確保自己收到最新既資訊
呢度就教一教大家點樣用官網黎搵資料同埋改choice

A. 改choice部份
(交錢部份同埋改choice既教學就請移玉步到呢度查看)

開account:
Step1 : 先上官網 再禁online application system


Step2 : 再禁create account


Step3 : 填資料




示範如下:



submit完之後會有一大堆既confirmation
分別係account & application fee兩樣
account如下:




application fee如下:



改choice方面
因為我已經submit左final choices
所以就cap唔到圖落黎
最多用文字解說
要圖文解說既 就麻煩睇番JUPAS user guide

文字解說:
Step1 : 禁番左上角深藍色既「programme choices」

Step2 : 禁右上角深藍色既「edit programme choices」
入番draft programme choices果度
(draft版本係唔會比大學見到既 得你自己先見到架姐
大學只會見到confirmed果個版本)

Step3 : 禁中間深藍色既「programme catalogue」

Step4 : 搵番相對既大學同埋學位 (bachelor / HD /asso) 再禁入佢顯示既數字入面

Step5 : 出左課程列表之後 就可以禁你想要既課程既右面一個綠色既圓圈 入面有個+號既

Step6 : 不斷重覆step4 & 5 直至入夠20個choices / 完成所有變動為止
要改變現有choices既排位
就可以left click禁實你想郁果個課程
再拉上拉落
就可以改到個排位
如果想刪走個課程
直接禁課程名右面一個紅色圓圈 入面有個-號既
咁就刪得

最後記得要禁埋右下角深藍色既「save draft」
如果唔係 一閂左呢個頁面就會冇左你頭先排好果個表架啦

Step7 : 排定哂之後
就可以禁右下角深藍色既「continue」
再係下面一個空白既box入面打番Yes
禁完右下角「submit」就會將你既draft choices變成confirmed choices
大學就會見到你既排位

B. 資料部份
呢度會介紹點樣去睇各個課程既資料、重要日期、課程改動既
Step1 :上左官網首頁之後 禁橙色果個「4-Year Curriculum (HKDSE)」

Step2.1 : 想睇各個課程既資料
就可以禁由左數起第3個橙色box「participating-institutions (參與院校)」入面既「programme information (課程資料)」
再禁入唔同大學 / 唔同lv of study去睇課程資料

通常較為有用既資料如下:
- programme website
- short description (有d會講埋yr2可以揀咩黎major 例如BBA)
- first year intake
- interview requirement
- admissions figures
- application statistics (main round)
- offer statistics (main round)
個人認為當中以application & offer statistics最值得參考
一來可以睇競爭既激烈程度
二來可以睇band B或以下會唔會收人
方便決定banding

Step 2.2 : 想睇重要日期既
就可以禁由左開始數起第4個橙色box「calendar (日程)」既「important dates (重要日程)」
假期表其實冇咩用 除非你需要去JUPAS辦公室
重要日程果度會列左大學open day日子同埋好多deadlines係度
所以要特別留意

Step2.3 : 想睇各大學課程既變改同埋各大學既活動
就可以禁最右面果個橙色box「news & events (最新消息)」入面既「institutions’ programme changes(院校課程更改資料)」同埋「events (活動/事項)」
兩個頁面既資料都好有用
尤其係programme changes
多數會同interview arrangements有關
所以一定要密切留意


2. JUPAS user guide
JUPAS自己整既教學黎
圖文並茂 而且好詳細
由系統介紹到改choice等步驟都一應俱全
一有咩唔識用 強烈建議拿拿林上去呢個user guide度求救

3.1 HKU admission
呢度會有港大既資料
專係用黎sell佢自己(好似係) 吸引你入去咁樣
(雖然HKU應該唔使sell都有好多人蜂擁而至)
「study at HKU」呢度會有講到港大既課程結構之類同大學生活有關既野
而「experiencing HKU as a secondary school student」就會介紹中學生可以參加既由港大所舉辦既活動
好有心想讀HKU既話 都建議大家多d黎呢個位度睇下
及早了解多d HKU

3.2 HKU one-stop-shop admission information
呢個網站真係好方便
專係比各位中6生睇番所有有關入HKU既資料
入面有以往既admission scores、今年既selection principles、interview arrangements
仲有個DSE online discussion forum
資料幾齊全下
對HKU有興趣既 呢個網站係必去的

4.1 CU new undergraduate curriculum
呢度有好廣泛既資料
curriculum方面 除左有每個課程既course list
仲會有faculty package & university core呢d大圍課程既資料
Double major / double degree呢類都有講到既
另外仲有financial aid / infrastructure等其他資料
確係幾方便

4.2 CU programme information
呢度同admission既關係就比較大
有programme list、admission score、weighting、interview arrangements
資料齊全之餘 亦都整理得幾好
所以都係好方便用家的
只係面試果度冇點樣提過形式
咁就要用其他途徑去搵料
例如係直接打電話去相關programme度問

5.1 UST interview schedule
好清楚咁講明每個學系既面試日期
一覽無遺
但係形式就欠奉
我唔知佢通知面試既時候會唔會講埋
但如果冇既 咁大概要打電話去問下UST先知

5.2 UST admission score calculator
幾方便既一個計入學分數既工具
Weighting果d野都幫你包埋
但之前聽聞好似有bug
宜家唔知整好未

6. poly programme information
同樣地 d資料整理得幾齊全
有齊咁多個programme既資料
例如係weightings、average scores、career prospects

7.1 city admission figures
City既admission figures係有埋入學分數同埋學生DSE既grades
入學分數係包埋weighting既
grade就寫明哂出黎
都幾清楚同埋易睇

7.2 city interview / test arrangements
呢度個表好詳細咁列明哂咁多個programme既interview & test既日期同其他詳情
日期仲有分埋放榜前同後

8.1 BU programme information
齊全既programme列表
禁入去想睇既programme 就會有quota之類既資料
仲有credit require for graduation & 學費呢d JUPAS官網冇既資料

8.2 BU admission figures
BU只會出mean、median、lower quartile
PS 唔清楚呢d figure包唔包埋interview之類既分數

8.3 BU interview / test schedule
寫明有interivew / test既programme既interview / test日期
除左一兩個programme之外 其他係放榜前後都會有interview既

8.4 BU programme specific entrance requirements
呢度會講低每個programme特別既entrance requirements (如有)
整理得幾清楚同詳細

9.1 IEd entrance requirements
入面有齊教院每個programme既收生要求
由基本至特別要求都會有
另外仲有講埋應用學習同埋其他語言科目既處理方法

9.2 IEd JUPAS calendar & interview shortlists
有講到IEd interview同埋programme registration既日期之餘
又有面試名單
方便報左IEd既中6生查閱

10.1 LingU admission scores
LingU除左出admission average score之外
仲有就每科主科同埋最佳選修科出左個average score

10.2 LingU entrance requirements
其實對比起其他大學
LingU既entrance requirements都幾含糊下-.-
weighting呢樣野我又唔多見有
但係要搵資料睇既時候 都係得呢頁同埋JUPAS programme information果度有entrance requirements架姐
所以我都放埋係度

11. OU programme information
有齊咁多個programme係度
想睇邊個programme就禁落去
個人認為有用既資料都係得admission requirements、programme structure、career and further studies
其他都冇咩特別

非官方網站:
A. ATUHK
超有用既非官方查以往收生成績既網站
強烈推薦
呢d收生成績係透過JUPAS申請人自願放番自己DSE成績同埋offer上黎
再聚集而成
佢會講埋呢個programme總共有幾多人放左上黎
仲有埋當中既性別分佈

使用方法好簡單
就係禁番上面黑色bar既「admission grades」
再揀番你想睇果個programme
揀法可以係禁institution & programme
又或者直接打果個programme個JUPAS code
咁就可以睇

附上一幅解說圖:


B. 學友社
學友社不嬲都有做好多野黎幫中學生考試 / 升學之類
而呢度就收錄左好多有關JUPAS既資料
個人認為當中以課程競爭形勢、面試資料、改選注意事項、面試技巧最為有用
另外仲有重考 / 副學位之類呢d JUPAS以外出路既資料
真係幾有用
亦都強烈推薦呢個網站比各位

小雪冰

待用

小雪冰

出路抉擇
最後更新：
20/7/2013 大致完成

再次重申：
呢度所講既內容難免會加入個人主觀意見
謹供參考之用
請勿作為全盤依據
本人不會為閣下任何決定負上任何責任
敬請留意

~可行出路~
一個中6學生讀完中學之後 可以有咩出路呢?
以我所知 就有呢d :
1. 升大學讀degree
2. 去大學 / 其他專上院校讀HD / ASSO
3. 讀毅進
4. 報職業訓練既課程
5. 重考 (repeat多年 考多次DSE)
6. 直接出黎做野
7. 海外升學

1. 讀degree
其實冇咩好講
係人都想一take過入大學讀degree架啦
問題係自己有冇咁上下既能力同運氣考好DSE姐
咁如果考得冇咁理想 就要搵其他出路啦

2. 讀HD / ASSO
自問DSE成績都係一般
要入degree有d勉強既
可以考慮下讀HD / ASSO

以我所知 通常會有3種方法去報呢種課程:
A. 經JUPAS申請 但係JUPAS會處理既課程真係幾有限下
B. 經E-APP申請 就唔使等放榜果日先擒擒青走去搵學校
C. 放榜果日拿拿林去撲學校 搞即日申請

E-APP就係另一個系統黎
用途同JUPAS差唔多 都係用黎幫手處理DSE學生入專上院校既申請
只係呢d院校就唔係大學黎既
可能係佢地既附屬院校 / 另外1d專上院校咁

個人認為如果係一心諗住入唔到degree就重考既學生
大可以唔報E-APP
處理E-APP其實都真係幾費神下
報既時候一定要睇清楚佢地既認受性、銜接大學既機會等等既資料
如果唔係 讀完之後先知原來唔受政府認可既
咁就真係喊都無謂
但係讀degree就唔會有呢d問題
第一年考試唔得 其實可以考慮下重考
有關重考既考慮 下面會再提及

回正題
想讀HD / ASSO呢
前提係你DSE起碼要有5條2先
跟住再搞清楚HD同ASSO兩樣野
先好諗呢條路
粗略黎講
副學士著重學術訓練 偏向講理論 方便銜接大學
而高級文憑就比較實用 方便你搵工
只要你成績夠好 當然都可以繼續升學既
咁就視乎你係想搵工著數d
定係仲想繼續升大學
黎決定究竟讀HD定ASSO好

3. 毅進
其實我唔多清楚毅進課程
淨係記得好似係連5條2都冇既學生 可以考慮下毅進
詳細資料我都要再搵下先講到比大家聽

4. 職業訓練課程
呢種課程就真係職業導向架啦
報得呢種 都係方便銜接就業
個人認為如果你覺得自己唔係讀書既材料
又或者冇心機讀書
咁就不如報d著重實用性既課程 出黎做野仲好
唔好咁執著 逼自己一定要讀
講真 你讀書都係想將來搵工容易d姐
既然你讀唔成書 / 冇心機讀
不如專注番係實用d既課程度啦

5. 重考
好老實咁講
只要符合下面所講既考慮條件
我個人建議寧願考多年
都唔好走去報HD / ASSO
原因下面會再講

我先講下重考有d咩要考慮先:
A. 個人能力
B. 重讀形式

A. 個人能力
如果係有能力爭degree
只係一時唔小心係DSE失左手既學生
大可以考慮下年捲土重來

不過要強調既係
如果本身能力一般
大概DSE成績都係徘徊係3同4之間既話
咁就算重考 係咁短時間之內(頂龍得大半年時間比你預備)
個grade都未必升得多
係呢種情況之下 或者讀其他課程會更加適合
例如HD / ASSO / 職業訓練咁

B. 重讀形式
想考多年DSE既
一係就番學校讀多年中6
一係就自修

番學校讀既話 就要留意學校(無論係原校定其他學校)對重讀生既安排
例如係幾多分先收番你、報考科目仲一唔一樣、SBA既安排
特別要留意既係後兩者
因為間間中學開既選修科都唔一樣
你想讀果間學校未必開齊你宜家讀緊既所有選修科
你係想入呢間既話 咁就要放棄呢d果間學校冇開既選修科
姐係DSE冇得再考番呢d科目
至於自修呢d科目方面
我就唔多清楚學校會唔會比重讀生咁樣做
但應該多數唔得
事關佢都要確保番自己學校既學生質素

如果你想自修
咁一定要有番咁上下自制同埋時間管理能力先得
事關自修既話 你就唔使再做功課 / 考試
冇左平時學校比你既溫書動力
惟一既動力就係黎自你自己
你自己都冇動力溫書既話 冇人會逼你同埋催你溫
好啦 即使你有動力
點樣安排好d溫書時間都係一個問題黎
簡單黎講 自修就姐係完全靠自己去溫書
唔會再有其他人監住你
唔係個個都有咁既能力捱過呢大半年
所以想自修既話 必定要三思而後行

另外要留意既係
自修去考DSE既話
你既身份就係「自修生」
以前你仲係學生既時候 就話有學校幫你搞惦哂報名既野
但係宜家呢樣野就係要你自己去搞惦
所以當你埋頭苦幹咁溫緊書 (或者好勤力咁hea緊) 既時候
記得唔好錯過任何同DSE報名有關既程序

話說一開頭講到「有條件既話 寧願重考都唔好報HD / ASSO」
咁係因為
重考既話 就算唔得 都可以到時先再搵HD / ASSO報
得既話自然就最好 用多一年時間就入到大學
都幾抵啦

不過如果報HD / ASSO既話 (假設目的係銜接大學而唔係方便搵工)
除非肯定自己至少爆到3.X既GPA
如果唔係 GPA唔夠高既話 大學就唔收你架啦wor
到時冇得再話靠重考黎搏入degree
咁又點算好呢

就算係一路讀HD / ASSO
一路重考DSE
個人認為搏得番入degree既機會都唔高
難聽講句 淨係全職讀DSE既時候你都搞佢唔惦
何況仲要係兼顧緊HD / ASSO既時候?
咁正常黎講 既然你有課程讀緊
唔會打算完全放棄佢 淨係專心考番DSE既-.-
既然係咁 咁仲乜唔一開始就專心考DSE
唔讀HD / ASSO住呢
咁當然呢d都係我自己既諗法 做黎做參考就好了
我唔係踩低緊HD / ASSO價值
純粹係係重考同埋騎牛搵馬兩個決定之間做比較姐
或者大家有其他諗法都唔定

6. 直接出黎做野
um…個人就唔多建議咁快就揀呢條路
宜家香港學歷澎脹既情況好嚴重
當大學生都搵唔到野做既時候
何況一個中6畢業生呢?

姐係除非你屋企 / 親戚本身有開鋪頭
有d咩家業可以比你有個位打下工
咁都唔係話唔可以
不過長遠黎講
個人認為始終有番多些少學歷揸住係手係穩陣d既

7. 海外升學
我對海外升學呢條出路既資料都唔係幾清楚
我淨係知學費呢家野真係會幾貴下
而且再加埋生活費
條數都幾那利

另外 去到出面人生路不熟咁
冇人照應既 生活都幾麻煩下
宜家仲要係講緊升學
情況唔似交流團咁
去最多一年就番黎香港
而係分分鐘去幾年咁耐
所以考慮海外升學之前
真係要諗惦呢d考慮因素先

~總結~
只要做決定既時候 清楚自己咁樣做既目的係咩
老土d講句 咁就條條大路通羅馬
面對中6畢業呢個人生交叉點既時候
唔係求其搵條出路 行左先算就由佢
而係要諗清諗楚
務求最後決定符合到自己既需要、興趣、期望等
如果唔係真係有種自尋死路既感覺
咁就算有幾多條大路 對你黎講都係冇用
最後祝願大家搵到自己理想既出路啦

小雪冰

待用

intergration

335(5)3 45
a1 ust eng
a2/3 poly eng
派bandA機會大唔大

小雪冰

回復 9# intergration
um 麻煩你講清楚你既成績係邊科既成績黎
最好講埋electives

另外 可唔可以比齊頭3個choices我?
姐係band A既所有choices